Último simannan un par di video a keda di post riba ret social kaminda hóbennan alumno di skol ta envolví den bringamentu. Den un di e kasonan tabatin asta un mayor envolví. Netamente pa e motibu ei e kampaña “Legumai ‘beef’, por otro!” di e Kerncommissie Restorative Justice (Komishon Núkleo pa Hustisia Restorativo) ta un stap importante den evitá violensia i buska solushon alternativo pa konflikto bou di hóbennan.

“Legumai ‘beef’, por otro!”, ta un kampaña di informashon ku a kuminsá kana for di dezèmber 2019. Lamentablemente pa motibu di e pandemia di Covid-19 mester a para e kampaña pero awor ta bolbe bai sigui ku ne.  E kampaña ta enserá entre otro ku hóbennan na skol sekundario lo haña un pelikulá kòrtiku (short film) mira. E pelikula kòrtiku aki ta trata e tópiko ‘konflikto bou di hóben’ i ta laga mira kon por solushoná e konflikto aki pa medio di Práktikanan Restorativo. E pelikula ta presentá un situashon fèrfelu, kaminda pa motibu di redu entre hóbennan ta surgi un diskushon fuerte i un pelea entre dos alumno. Despues di e pelea ta invitá e alumnonan pa un kombersashon den grupo. Aki ta trata di papia tokante di e problema i yega na solushon i palabrashonnan. Ku e kampaña aki, e organisashonnan ku ta traha huntu riba e tópiko aki ta trata – pa via di skolnan – mustra ku por solushoná malkomprondementu i konflikto di un forma mas pasífiko.

Kolaborashon

E produkshon di e pelikula kòrtiku aki ta sali for di un kolaborashon entre diferente organisashonnan ku ta traha huntu riba e tema di Restorative Justice i Restorative Practices. Ta trata aki di UO Reclassering Curaçao, N&M Mayor i Yu, Justitiële Jeugd Inrichting Curaçao (JJIC - antes GOG), Stichting Slachtofferhulp Curaçao, SEDA (Sentro Di Dama), Stichting Ambulante Justitiële Jeugdzorg Curaçao (AJJC), Vereniging voor Protestants Christelijk Onderwijs op Curaçao (VPCO), Triple A Attorneys, Kuerpo Polisial Kòrsou (Korps Politie Curaçao – KPC), Ministerio Públiko Kòrsou i Ministerio di Hustisia. E produkshon di e pelikula tabata den man di e señora Iris Ludekuse, dosente di drama na Albert Schweitzer VSBO (VPCO). E aktornan (alumnonan di Albert Schweitzer VSBO) a keda bou di impreshon di e pelíkula pero tambe di e tópiko. Durante di e estreno di e pelíkula na e hóbennan, e alumnonan a para ketu riba e konsekuensianan di konflikto tantu riba termino korto komo termino largu i riba e gran importansia di solushoná konflikto na un manera diferente.

Kolaboradó di Stichting Slachtofferhulp Curaçao ta duna informashon na hóbennan tokante Práktikanan Restorativo

Práktikanan Restorativo

E aserkamentu aki ku ta presentando na e hóbennan, yama Práktika Restorativo. Práktikanan Restorativo ta un manera pa atendé ku konfliko. For di un investigashon hasí na Schotland, tin indikashon ku skolnan ku ta apliká Práktikanan Restorativo korektamente, tin ménos konflikto i bringamentu i e kantidat di mucha ku ta saka for di klas a bira ménos. Práktikanan Restorativo ta sali for di e prinsipio di Hustisia Restorativo. Hustisia Restorativo (òf ‘herstelrecht’) ta basá riba un model hudisial, kaminda e enfoke ta mas riba restourá e daño hasí i di e forma ei restourá e relashon, embes di enfoká riba e kastigu pa e malechornan. Ministerio Públiko ta aplika e método aki den algun kaso. E organisashonnan ku ta traha huntu ta haña di sumo importansia pa komunidat di Kòrsou sera konosí ku e forma aki di solushoná konflikto. Den práktika por mira ku voral hóbennan mester bira mas konsiente di kon ta e mihó manera pa solushoná konfliktonan.

Kampaña di  informashon

Despe ku pasa e pelikula kòrtiku pa alumnonan di skolnan sekundario, lo tene kombersashonnan den sirkulo ku e hóbennan bou di guia di un eksperto di un di e organisashonan ariba menshoná. Aki e hóbennan lo kombersá i diskutí riba nan propio situashonnan. Banda di e rekorido na skolnan kaminda lo pasa e pelikula kòrtiku, tambe e organisashonnan lo tene entrevistanan ku prensa pa asina pone un lus riba e tema. Ademas, ta e intenshon pa na final di e kampaña organisá un kompetensia i un debate bou di hóbennan.

Kombersashon den grupo entre dosente i alumnonan despues di a wak e pelíkula

Por mira e ‘trailer’ di e pelikula kòrtiku “Legumai ‘beef’, por otro!” riba e página di Facebook di Ministerio Públiko. Skolnan sekundario ku ke bini na remarke pa un presentashon di e pelikula “Legumai ‘beef’, por otro!” por tuma kontakto via di kcrjcuracao@gmail.com òf riba 5262791.