Bo tin but habrí òf a yega di hasi un areglo pa paga un but i no a kumpli ku esaki? Tuma kontakto ku e departamento di Paga bo But di Ministerio Públiko pa rekuperá e retraso den pago.

Denter di poko, personanan ku a kometé entre otro mas di un infrakshon ku tin montantenan grandi di but habrí, lo risibí un envelòp blou den buzon. Nan ta bai haña un rekordatorio pa paga e montante habrí denter di dos siman después di fecha di e karta. Un bes mas Ministerio Públiko kier a rekordá un i tur ku si no paga e but, lo dagfar e persona i lo mester presentá den korte. Durante e kaso den korte, Ministerio Públiko lo demandá un montante di but mas haltu. Si hues bai di akuerdo, ta bini un sentensia ku e suma di e but. Mayoria biaha e but aki ta por lo menos 20 porshento mas haltu ku e montante di transakshon. Alabes lo stipulá un kantidat di dia di kastigu di prisòn ku si e but no wòrdu pagá lo mester sinta den SDKK. Korda bon ku no ta tuma sèn kèsh. Por paga solamente via maestro. Bai ku kuidou pa bo no haña un blou.

Ofisina di Paga Bo But ta situá na Waaigat, p’ariba di ofisina di Curoil riba Abraham Chumaceiro Bulevar 11. Por hasi pago tambe online via bo banko riba kuenta di MCB 23329801. Ministerio Públiko ta konsehá kada persona ku tin but habrí, pa pasa paga e transakshon promé ku e kaso bai Korte i evitá ku e but ta subi. Sigui nos tambe riba Facebook: Paga bo But. Por haña mas informashon tambe via Whatsapp: +59994342120 òf +59994342146.