Via medionan sosial a aparesé imagennan gráfiko den kual por a mira kon un hoben bayendo skol tabata wòrdu maltratá dor di un otro. Ministerio Públiko (OM) i Kuerpo Polisial Kòrsou (KPC) a tuma nota di esaki i aktua mesora a base di denunsia ku a wòrdu hasí. Den kuadro di esaki a detené dos hoben menor di edat. Despues ku polis a interogá nan, nan por a bai. E investigashon den e kaso aki ta kontinuá.

Alabes siman pasá un skol a hasi denunsi di imagennan inapropiá ku a aparesé diripente durante un les online via Zoom. En konekshon ku esaki un hoben menor di edat a wòrdu interogá dor di polis i a atmití ku e la kometé e echo aki. Despues di e interogashon, e hoben menor di edat por a bai. No ta ekskluí ku tin mas persona envolví pa ku e echo aki. E kaso aki tambe ta den investigashon.

Tantu OM komo KPC ta enfatisá ku e komportashon aki no ta wòrdu tolerá i ku e por tin konsekuensia serio pa e malechornan. Den e krisis di corona ku tur e medidanan mester por konfia ku alumnonan por sigui nan lès di un manera seif. Distribushon di imagennan inapropia of inmoral ta kastigabel i por kondusí na kastigu di prisòn of detenshon hubenil.