Djabierne 20 di ougùstùs 2021, un notario a paresé dilanti Korte di Promé Instansha di Kòrsou. E ta ser sospechá di a transferí, for di su ofisina, kantidatnan di sèn sin base legal for di e kuenta di fondo di tersero di kantor di notario pa su kuenta privá i tambe di a husa e fondonan aki pa ophetivonan privá.

E kantidatnan depositá riba e kuenta di fondo di tersero tabata konserní sumanan di klientenan di e kantor di notario. Según e notario mes, e sèn no tabatin niun otro destinashon. Sin embargo, Ministerio Públiko  ta haña esaki  irelevante y ku e sèn mester a ser depositá bèk na e propietarionan legítimo. E karakaterístika di un kuenta di fondo di tersero ta ku e fondonan di  otro personanan ta wardá riba e kuenta ei dor di e notario, i no por wòrdu husá pa benifisio propio.

For di investigashonnan di Landsrecherche, den kolaborashon ku e outoridatnan fiskal i TIO, a demostrá ku e a husa e fondonan  di e kuenta di fondo di tersero  komo un tipo di banko interno pa ophetivonan privá durante di hopi aña. 

E akusado a abusá gravemente di su posishon komo notario i di e konfiansa ku e klientenan mester por a tin den dje.  Un notario mester ta inkoruptibel i tambe aktua komo tal. Ku su aktuashon el a hasi un daño grave na e konfiansa ku por ser depositá den un notario. 

Pa e anterior, Ministerio Públiko a demandá un kastigu di prizòn di 18 luna, di kual 6 luna, ku un periodo di prueba di 3 aña. Ademas di esaki, a demandá pa e no por ehersé su funshon di notario pa un periodo di 5 aña.  Korte lo dikta sentensia den e kaso aki 10 di sèptèmber.

Landsrecherche ta un organismo investigativo independiente ku un tarea spesial. E ta orientá su mes riba persekushon di delitonan kometé dor di funshonarionan (semi)gubernamental. Landsrecherche ta aktua prinsipalmente den e ámbito di kondukta kastigabel  ku ta afektá e integridat di e atministrashon di hustisia i e integridat di e atministrashon públiko gravemente.