For di mart 2020, gobièrnu a tuma vários medida pa evitá e posibel plamamentu di Covid.

Por ehèmpel, durante di temporadanan spesífiko ta tin toke de keda, obligashon pa usa tapaboka i negoshinan tabata tin otro orario. No ta tur hende a wanta nan mes na e medidanan i vários siudadano i negoshi a haña un prosèsferbal en konekshon ku infrakshon di e medidanan di Covid.

Awe mainta, djárason 20 di yüli, un kantidat di hende mester a presentá dilanti di korte pa responsabilisá nan mes pa inkumplimentu di e medidanan di Covid. Ministerio Públiko (OM), despues ku a trata e promé kasonan, a konstatá ku e kastigunan ku a keda imponé tabata desviá fuertemente for di e demandanan formulá dor di OM. Na e momentu ei, OM a disidí di hala e kasonan aden pa asina por deliberá ofer kon na kontinuashon lo atendé ku e kasonan aki.