Siman pasá, Kim Roelofs i Rebecca Leeuwenberg, MfN (Federashon di mediashon na Hulanda) mediadónan registrá den kasonan penal i familiar for di Hulanda, a duna un serie di masterclasses tokante di mediation den kasonan penal i hustisia restourativo. Empleadonan di Ministerio Públiko (OM), inkluso fiskalnan i sekretarionan di OM i tambe sosionan den kadena hudisial entre otro Korte Komun, Kuerpo Polisial, Reclassering, AJJC, Veiligheidshuis i otro partidonan interesá a partisipá. Lisette Chandani-Poppen tabata e konferensiante invitá for di OM.

Mediation ta un proseso ku ta ofresé e sospechoso i e víktima e oportunidat pa establesé un diálogo ku otro di un manera respetuoso i kuidadoso pa ku e delito ku a tuma lugá  bou di guia di un mediadó independiente. Por hasi uso di mediation ku menor i tambe adulto.

Na promé lugá e mediadó ta realisá un entrevista di atmishon (un “intake”). Si tur dos partido ta deseá esaki, un kombersashon konhunto lo tuma lugá. Mediation ta kompletamente konfidensial. Partisipashon ta boluntario. E mediadó ta neutral, independiente i imparsial i no tin ningun interes den e resultado. E sospechoso mester a atmití kulpa di antemano si i tambe mester ta dispuesto pa tuma responsabilidat. E ora ei, e dos partidonan ta bai papia ku otro tokante di loke a pasa, e propio persepshon, e konsekuenshanan i kiko ta nesesario pa rekuperashon. Finalmente e meta ta pa yega na un solushon ku ta aseptabel pa tur dos partido. E akuerdonan tin un orientashon pa ku futuro i solushon.

Despues di e kombersashon konhunto e mediadónan por pone e puntonan di mas importante i eventual akuerdonan, por ehèmpel tokante di komportashon futuro i/òf daño i perhuisio, den un akuerdo final. Lo añadí e akuerdo final na e fail penal. E fiskal òf e hues lo tene kuenta ku e kontenido di e akuerdo aki den e desishon di persekushon i/òf sentensia. Mediation ta buta ku e partisipantenan por tin un influensha aktivo riba nan situashon. Mediation ta ku e hendenan, no tokante di e hendenan. 

Hustisia na Kòrsou ta di opinion ku mediation tin un balor agregá pa Kòrsou tambe. Ku sospechoso- i testigunan mes ta haña e responsabilidat pa solushoná problemanan i buska un manera pa restourá e daño kousá. Investigashon a demostrá ku mediation pa sospechoso- i víktimanan por kondusí na mas komprenshon, entendimentu mutuo, propio direkshon i asina tambe ta aportá na redusí residivismo. Por husa mediation den tur tipo di kaso, di ladronisia te maltrato, di pleitu entre bisiña te delitunan seksual, mirando ku  mediation no ta remplasá derecho penal. E ta komplementá e sistema eksistente, ya ku derecho penal no tin komo meta e resolushon di konflikto ni rekuperashon emoshonal. 

Den e kaso konkreto aki di mediation den derecho penal, Korte Komun ta duna su apoyo na e inisiativa di OM pa poné den praktika na Kòrsou i sperando ku pronto tambe na e otro islanan. Esaki ta importante pasó e tin un efekto no solamente riba e sospechoso, sino tambe riba e víktima i e rekuperashon ku nan ta haña den esaki.