Lisette Chandnani-Poppen 30 aña den servisio di gobièrnu

E tin un historia largu komo ámtenar na Kòrsou. E la traha 17 aña na Bureau Vrouwenzaken i for di 2011 e ta na Bureau Mediation di SOAW. E ta speshalisá den práktika restorativo, mediashon i mediashon laboral i mientrastantu tabatin chèns tambe pa optené su MBA. For di 2017 e ta traha komo mediador na Ministerio Públiko unda entre otro e ta apliká intervenshon den kasonan penal.

Pleitu doméstiko, tròbel ku bisiña, konflikto den famia, e por atendé ku tur. Su abildat empátiko i tambe pa skucha ta sòru pa un porsentahe di solushon hopi haltu. No solushon di un delitu manera polis ta hasi esaki, sino mas fundamental, esta solushon di e motibu di e disputa.

“Lisette, bo koleganan ta konsiderá bo un persona alegre, ordená i ku hopi komprenshon. Tur ta kalidatnan ku ta útil den bo trabou, pero ta hasi ku bo ta un kolega agradabel pa traha kuné”, según fiskal mayó Heiko de Jong. Lisette a sinti ku for di un prinsipio e la keda aseptá ku brasa habrí na OM i a haña e espasio pa forma su mes den e proseso i pa esaki e ta hopi gradesido na tur.

Lisette a haña un bunita opsekio na nòmber di Ministerio Públiko pa 30 aña di fiel servisio. Despues di e parti ofisial kòrtiku tur hende por a disfrutá di algu di kome i bebe.