Ministerio Públiko (OM) a tuma nota di un posibel insidente na momento di un kòntròl preventivo di polis na Marnix College.

Pa e motibu aki, Landsrecherche, bou di guía di un fiskal di Ministerio Públiko ta bai hasi un investigashon profundo den e kaso aki. Komo ku ta trata di un investigashon koriente, na e momento aki no por duna mas informashon.

Landsrecherche ta un organo investigativo independiente ku un tarea speshal. E ta orientá su mes riba persekushon di delitonan kometé dor di funshonarionan (semi)gubernamental. Landsrecherche ta aktua prinsipalmente den e ámbito di kondukta kastigabel  ku gravemente ta afektá e integridat di e atministrashon di hustisia i e integridat di e atministrashon públiko.