Riba petishon di Ministerio Públiko Kòrsou, djarason 24 di febrüari a detené e sospechos J.K. di 36 aña di edat na Hulanda den e investigashon Themis. Ta sospechá J.K. di tabata envolví den un tiroteo konosí na Kòrsou komo e “Hato shooting”.

Riba 15 di yüli 2014 a asesiná dos persona na Aeropuerto Internashonal di Kòrsou ku arma di kandela outomátiko. Shete hende presenta na aeropuerto a keda herida. Anteriormente a detené 5 persona den e kaso aki. E dos tiradónan a keda kondená na kastigu di prisòn di bida largu. E otro tres sospechosonan a keda kondená na kastigunan di 12, 14 i 24 aña.

Ta reprochá J.K. di tabata envolví den e asesinatonan. Mirando ku J.K. tabata residensiá na Hulanda, Ministerio Públiko Kòrsou a hasi petishon na Hulanda via di órden di hues-komisario di Kòrsou pa su detenshon i traslado pa Kòrsou. Entretantu a trasladá J.K. pa Kòrsou i e siman aki e lo presentá dilanti hues-komisario.

Themis ta un investigashon di echonan kometé den diferente pais den Reino Hulandes i otro pais pafó di esaki. Speshal pa e investigashon aki a forma un tim di reshèrshi ku ta konsistí di miembro di kuerponan polisial di Sint Maarten, Kòrsou, Aruba i tambe e Tim di Koperashon di Reshèrshi (RST). E tim aki ta kai bou di mando di Ministerio Públiko di Sint Maarten i Ministerio Públiko di Kòrsou.

Anteriormente den e investigashon aki tabata tin detenshon na Kòrsou na luna di novèmber2020 i febrüari 2021.

Es ku tin informashon ku por yuda e tim di investigashon por tuma kontakto ku e tim via di e siguiente numbernan di telefòn/Whatsapp: +5999 521 3865 (Kòrsou) òf +1 721 586 5052 (Sint Maarten).

Es ku ta preferá di keda anónimo por kompartí informashon dia di e siguiente liña di tep (tambe Whatsapp): +5999 679 2896 (Kòrsou) o +1 721 553 0561 (Sint Maarten).