Manera Minister di Hustisia, Sr. Quincy Girigorie a primintí ku entrante djabièrnè, 14 di mei 2021 Stuurgroep Elektronisch Toezicht lo start ku un trayekto nobo di supervishon elektróniko ku banchi.

Supervishon elektróniko ku banchi ta un alternativa pa kastigu di prisòn real bou di guia i supervishon di reclassering.  Supervishon elektróniko  ta wòrdu mirá komo kondishon, pa duna pèrmit na e detenido pa e keda for di prisòn den forma di entre otro suspenshon di e detenshon preventivo, kastigu di prisòn kondishonal i interupshon di ehekushon di kastigu di prisòn, den kuadro di “detentiefasering” i e ta wòrdu kompañá ku un programa traha na midi pa e persona konserní.

Nos a risibí 50 banchi nobo for di éksterior. Durante e siman tras di lomba i e siman aki diferente tèstmentu di e aparatonan nobonan a tuma lugá. Kompará ku e banchinan anterior, e banchinan aki ta super moderno, pasombra nan ta mas leve i mas agradabel pa e partisipante ku tin’e bistí. E kargamentu ta sosodé kompletamente “wireless” i nan tin  “GPS-tracking”. Personal di Strongroom di Sentro di Detenshon i Korekshon Kòrsou a haña treinen di monitoreo di e personanan kondená ku lo ta bou di supervishon ku banchi. E instansianan di reclassering di adulto i hóben tambe a risibí treinen adekuá pasombra nan lo ta enkargá ku e supervishon i e programa individual pa e personanan ku banchi.

E Stuurgroep Elektronisch Toezicht aktualmente ta wòrdu presidí pa Ministerio Públiko i ta konsistí tambe di representantenan di Ministerio di Hustisia,  instansianan di Reclassering pa adulto i hóben, Sentro di Detenshon i Korekshon Kòrsou, Kuerpo Polisial di Kòrsou (KPC), Centraal College voor de Reclassering i tambe un “Coördinator Elektronisch Toezicht” ku a wòrdu apuntá pa vigilá henter e proseso.

Supervishon elektróniko ta un fabor. Si bo komportá malu den prisòn bo no ta bini na remarke pa supervishon elektróniko ku banchi.