Violensia relashonal ta violensia komete den relashonan amoroso i den seno famiar te den terser grado. E tema tin atenshon spesial di Ministerio publiko desde 2004. Na 2010 a adapta e instrukshon i na 2017 esaki a haña atenshon spesial komo un instrukshon pa BES, Sint Maarten i Korsou. Minsiterio Publiko ta persigui tur kaso di violensia relasonal 

Den violensia relashonal ta trata generalmente (pero no semper) di violensia físko i/òf seksual, akompañá of no dor di daño di biénes, kaminda e malhechor i e víktima ta pariente di sanger òf via di kasamentu òf ku nan tin un relashon amoroso (ekstramarital) ku otro òf ku nan tin of tabata tin un relashon amoroso ku un mitar di un pareha kasá i/òf ku ta amigu/a (di kas) di otro. Violensia relashonal por ekspresá su mes den menasa i “stalking”. Violensia relashonal por tuma lugá tur kaminda i no ta limitá su mes na un hòmber ku ta maltratá su partner femenina i/òf su yunan. Wèl ta asina ku víktimanan di violensia relashonal den mayoría di kaso ta hende muhé i mucha, pero e ta toka hende hòmber, mayornan i hende grandi (ansianonan). Ta den masha poko kaso víktimanan ta hasi denunsia. Un parti di nan no tin kurashi pa hasi denunsia òf nan ta asumí ku polis i hustisia lo no hasi nada ku e denunsia.

Pa basta tempu kaba violensia relashonal tin atenshon partikular di Ministerio Públiko. En prinsipio, Ministerio Públiko semper ta persiguí kasonan ku por wòrdu probá. A revisá e direktiva di 2006 kompletamente den 2010 i a suplement’ é ku determinashonnan ku ta konsiderá mucha tambe komo víktima ora ku nan ta testigu di violensia relashonal, pa asina nan tambe por haña yudansa pa víktima. Si un mucha ta un víktima òf un testigu di violensia relashonal, ta hasi un mèldu na Centraal Meldpunt Kindermishandeling (Sentral pa Mèldu Maltrato di Mucha)

Si den bo serkania tin kuestion di violensia relashonal, bo por mèldu esei i/òf hasi diskutibel na Stichting Slachtofferhulp Curaçao (tel. 747 7229 / 510 7575). Bo por bai einan si akaso bo no ke hasi un mèldu òf denunsia ahinda na polis. Huntu ku Slachtofferhulp bo por konsiderá bo siguiente pasonan.Den tur otro kaso bo por dirigí bo mes na e warda di polis mas serka den bo bario.