Huisio penal ta orientá su mes riba mantenshon di órden hurídiko. Tradishonalmente, e sospechoso ta sentral den esaki. E ultimo añanan kada bes ta poniendo mas atenshon riba e posishon di e víktima. Legalmente e término ‘víktima’ no ta eksistí. Den e huisio penal e víktima no tin un papel ofisial.

E kódigo di enhuisiamentu penal si tin algun determinashon pa ku e ‘partido perhudiká’. Kalke persona ku a sufri daño dor di un delito di un otro persona (artíkulo 206 insiso 1, WvSv), por akoplá su mes komo partido perhudiká den e huisio penal. Esei pues ta e víktima, pero e por ta eventualmente e parientenan di un defuntu víktima.

Ministerio Públiko ta mira e kuido i atenshon pa e interesnan di e víktimanan komo un parti importante di un bon atministrashon di hustisia, kaminda un tratamentu korektu ta prinsipal. E víktima ta bin dilanti serka Ministerio Públiko na e momentu ku e kaso keda registrá na parkèt. Ministerio Públiko ta aspirá pa un trato profeshonal di víktimanan den e fase di búskeda, persekushon i ehekushon.

E puntonan di salida pa e realisashon pa kuido di víktimanan ta:

  1. Un trato korekto i mas tantu posibel personal di e víktima;
  2. Suministrashon di informashon na e víktima, kaminda e punto di salida ta konta ku informashon klaru i relevante mester wòrdu suminstrá mas pronto posibel na e víktima;
  3. Den kuadro di e tratamentu di e kaso, e partido perhudiká mester wòrdu informá tokante di e posibilidat pa akoplá su mes na e kaso komo esei. Den e kaso aki mester wòrdu mustrá riba e posibilidat pa pidi daño i perhuisio material i inmaterial.

Na e momentu aki ta trahando riba e desaroyo di e Instrukshon Partido Perhudiká i Kuido di Víktima pa parkèt di Fiskalnan Kòrsou. Den e instrukshon aki, lo bo haña mas informashon spesífiko tokante di e manera ku Ministerio Públiko ta envolví e víktima den e huisio penal. Asina ku e instrukshon a ser stipulá, lo por download e via di e wèpsait.

Wak tambe: Stichting Slachtofferhulp Curaçao (lenk eksterno)(tel. 747 7229 / 510 7575)