Veredikto den kaso kontra agente di KPC
Willemstad, 6 di yüni 2025 - Riba djabièrnè 16 di mei 2025, un agente polisial di Kuerpo Polisial Kòrsou (KPC) a presentá dilanti hues. Dia 18 di desèmber 2021 sentral di polis a dirigí e agente na un insidente di un meldu di un robo di outo. E sospechosonan a hui den un outo. Durante e persekushon e agente a tira riba e outo. Despues ku e outo di huida a para den e bario di Wishi i sospechosonan a hui na pia, a lòs bala dirigí atrobe. Un di e sospechosonan, ku e tempu ei tabata menor di edat, a keda heridá. Manera ta kustumber Landsrecherche Kòrsou (LrC) bou di òrdu di Prokurador General di Ministerio Públiko, a hasi investigashon di e insidente di tiramentu.
Segun e agente el a aktua den defensa propio. Awe Hues a dikta sentensia den e kaso i a husga - meskos ku Ministerio Públiko - ku e agente no a aktua segun e reglanan establesé i ku no tabata tin un situashon kaminda e agente tabata permití pa tira. A imponé un kastigu di trabou kompletamente kondishonal di 50 ora na e agente. Esaki ta nifiká ku lo implementá e kastigu solamente si denter di un aña e kometé un fayo di nobo. Hues a mustra ampliamente riba e sirkunstansianan partikular di e kaso. E kastigu ta konforme demanda di Ministerio Públiko
Ministerio Públiko ta para pa un Kòrsou seif i hustu. Polis ta hunga un ròl grandi pa mantené órden públiko i seguridat di e isla i su habitantenan. Ministerio Públiko ta evaluá aktuashon di ámtenarnan di polis semper ku hopi koutela, sigur kaminda ta trata uso di violensia.