Djárason 14 di sèptèmber e sospechoso M.T. mester a presentá den Korte di Promé Instansia na Boneiru. E la wòrdu sospecha di a hasi su mes kulpabel na un kantidat di ladronisia prinsipalmente na lugánan turístiko riba e isla. Banda di esaki tabatin kaso di kiebro den bibienda, un atrako, hòrtamentu di outo i vários bendementu di artíkulonan hòrtá.

Aña pasá i na inisio di e aña aki, e kantidat di denunsia di turista pa loke ta trata hòrtamentu di plaka, telefòn selular, pòtmòni, ets. na entre otro 1000 steps, Alta Mira i Seru Largu tabata hopi. Den lunanan di aprel i mei, despues di detenshon di M.T. riba 28 di mart último, e kantidat di denunsia tabata sero.

Durante di hopi  luna, KPCN a hasi investigashon a base di lokual a haña den telefòn selular konfiská, tapmentu di telefòn, análisis di historia di yamada, testigunan i artíkulonan konfiská. Diferente denunsia a keda kompará ku lokual a sali for di e investigashon i na final e sospechoso mester responsabilisá su mes pa diestres (13) echo kastigabel.

Esakinan ta echonan kastigabel hopi serio ku un impakto hopi haltu, no solamente for di e punto di bista di seguridat sosial den e komunidat chikitu di Boneiru i turista ku ta bishita e isla i konsekuentemente tambe e imágen di Boneiru, pero tambe ku konsekuensianan emoshonal grandi pa e víktimanan.

Segun Ministerio Públiko (OM) e sospechoso a kometé e ladronisianan puramente pa gana di plaka, kaminda e la hasi su aktonan sin eskrúpulo i premeditá. E la saka potrèt di artíkulonan ku e la hòrta pa su mes i graba mensahe manera: “Nobody can stop me” (niun hende no por stòp mi). Un di e víktimanan a vosiferá esaki perfektamente: “he took selfies holding the items he stole from us, proud and unashamed” (e la saka selfie ku e artíkulonan ke e la hòrta for di nos, sin bèrgwensa i ku orguyo).

Pa e motibu aki i paso e sospechoso tin un historia largu serka polis i hustisia, OM a hasi un demanda di nuebe (9) aña di kastigu di prisòn.

Korte di Promé Instansia a kondená e sospechoso mes un mèrdia na un kastigu di shete aña i mei (7 ½)

Un kantidat di víktima a sufri hopi daño finansiero. Nan demanda pa daño i perhuisio material i inmaterial pa míles di dòler a wòrdu otorgá. M.T. mester paga e sumanan aki na e víktimanan.