Ministerio Públiko ta atvertí: reklutá partisipantenan pa wega di piramit tambe por ta un echo kastigabel
No ta solamente e organisadónan di wega di piramit por ta kometé un echo kastigabel. Personanan ku ta rekrutá aktivamente otronan pa partisipá den e tipo di weganan ei tambe por ser konsiderá responsabel penalmente. Esaki a keda enfatisá dor di Prokurador General di Ministerio Públiko (OM) durante un programa na radio, ku a bai den detaye kon weganan di piramit ta funshoná i e posibel konsekuensianan pa esnan enbolbí.
Tantu víktima komo sospechoso
Ministerio Públiko ta enfatisá ku partisipantenan den un wega di piramit mester ta konsiente di e riesgonan. Tur hende ku invertí plaka den un wega di piramit ta kore e riesgo di pèrdè henter su invershon. Si e mesun persona ei despues ta rekrutá otro hende pa partisipá, dependiendo di e sirkunstansianan, e persona por ta responsable penalmente tambe.
Esaki ta nifiká ku un persona por ta tantu un víktima komo un sospechoso na mes momentU. Un partisipante por keda afektá dòbel di e manera ei: promé pa pèrdida finansiero, i despues pa posibel konsekuensianan penal i pa enbolbí otronan aktivamente den e wega di piramit.
Asta esnan ku den kuminsamentu ta djòin sin ningun intenshon malisioso mester ta konsiente ku rekrutá partisipantenan nobo por trese konsekuensianan hurídiko.
Splikashon di konferensia di prensa anterior
Durante e programa di radio, Prokurador General a reflekshoná tambe riba un konferensia di prensa anterior riba e tema aki. El a indiká ku el a papia tokante esaki ku tantu e periodista enbolbí komo e funshonario di Ministerio Públiko ku a partisipá na e rueda di prensa. For di e kombersashonnan aki a konkluí ku por a maneha tantu e manera ku e preguntanan a keda formulá komo e manera di kontestá di un manera diferente. Tur dos partido enbolbí a indiká ku situashonnan asinaki lo keda prevení den futuro.
Ministerio Públiko ta duna hopi importansia pa sòru pa e mensahe keda transmití na un manera kla. E kontenido no mester pèrdè balor pasobra tur atenshon ta dirigí riba e forma di komunikashon.
Transmishon disponibel pa tur medio di komunikashon
Pa garantisá ku e informashon suministrá ta alkansá mas hende posibel, Ministerio Públiko ta pone e transmision disponibel pa tur medio di komunikashon. Esaki ta duna medionan di komunikashon ku no a wak e transmishon bibu e oportunidat pa revisá e splikashon kompleto ku Prokurador General a duna.
Klik hier om het audio fragment te beluisteren (Klik e link pa skucha e fragmento, kortesia di Radio Hoyer)
Ministerio Públiko ta enfatisá ku edukashon i konsientisashon apropiá ta importante pa evitá ku mas hende ta bira víktima di wega di piramit òf ta enbolbí nan mes den echonan kastigabel.