Ministerio Públiko ta atvertí kandidatonan ku a bai elekshon
Ministerio Públiko a risibí informashon di Konseho Supremo Elektoral Kòrsou ku tin 30 kandidato ku posiblemente no a kumpli ku nan responsabilidat segun artíkulo 12 insiso 2 di Ordenansa di Finansiamentu di Gruponan Polítiko (Landsverordening Financiering Politieke Groeperingen). Ta konsiderá esaki komo algu kontra di lei.
E artíkulo aki ta obligá kandidatonan pa entrega un deklarashon di regalonan risibí òf un deklarashon nulo (si no a risibí regalonan).
Entretantu Ministerio Públiko a manda un karta di atvertensia pa e kandidatonan. Nan tin un luna di tempu despues ku a risibí e karta pa kumpli ku nan responsabilidat.
Ministerio Públiko ta hasi un yamada na tur kandidato ku no a hasi esaki ainda, pa entrega nan deklarashon mas pronto ku ta posibel pa drecha e violashon aki i evitá posibel persekushon penal.