Korte ta kondená sospechosonan den investigashon Girona
Korte di Promé Instansia di Kòrsou a kondená J.T. na seis (6) aña di prizòn inkondishonal pa trafikashon di droga i labamentu di plaka habitual. Den e mesun investigashon, konosí komo ‘Girona’, J.T-F. i nan kompania J. tambe a keda kondená. Tambe, e tres personanan kondená mester paga e entrada prosedente di aktividatnan kriminal bèk.
E investigashon a enfoká riba J.T., J.T-F., i kompania J., di kua nan ta e uniko akshonista i direktornan.
Kondena i Sentensia
Korte a imponé e siguiente kastigunan:
• J.T.: seis (6) aña di prizòn inkondishonal pa trafikashon di droga i labamentu di plaka habitual.
• J.T-F.: seis (6) luna di prizòn kondishonal, ku un periodo di prueba di dos (2) aña, i 120 ora di kastigu di trabou pa falsifikashon. El a keda apsolvé di komplisidat den labamentu di plaka habitual.
• Kompania J.: un but di XCG 100.000 pa labamentu di plaka habitual i falsifikashon.
Tráfikashon di droga
Korte a kondená J.T. pa trafikashon di droga, entre otro 191 kilo di kokaína. Segun Korte, el a gana XCG 511.860 ku esaki. Ademas di su kastigu di prizòn, e mester paga e montante aki na Pais komo ekspropiáshon di e entradanan kriminal aki.
Labamentu di Plaka Habitual
Korte a kondená J.T. i e kompania pa labamentu di plaka habitual durante un periodo di nuebe (9) aña. Den kaso di J.T., e suma total envolvi ta XCG 453.474. A usa e plaka aki entre otro, pa kumpra un vehíkulo i oloshinan, i tambe pa kompranan pa e kompania.
E kompania a keda kondená pa labamentu di plaka habitual di XCG 285.875. E montante aki ta parti di e XCG 453.474 menshoná anteriormente. J.T-F. a keda absolví di komplisidat den labamentu di plaka habitual.
Falsifikashon
A kondená J.T-F. i e kompania pa falsifiká un dokumento finansiero. Segun Korte, nan a entrega e dokumento falsifiká aki na un banko pa haña un fiansa.
Ekspropiáshon di entrada prosedente di aktividatnan kriminal
Banda di e obligashon di pago di XCG 511.860 pa J.T., Korte a imponé un obligashon di pago separá ku ta suma XCG 453.474 riba e tres personanan kondená. J.T., J.T-F., i e kompania mester paga kada un XCG 151.158 di e montante aki na Pais.
E desishon aki ta basá riba un kalkulashon finansiero den un rapòrt di ekspropiáshon. Esaki ta mustra ku, pa vários aña, e tres personanan kondená tabata poseé mas sèn kèsh ku nan por a hustifiká legalmente. Segun Korte, e suma aki sin duda mester ta prosedente di aktividatnan kriminal.
Tokante e investigashon
RST a kondusí e investigashon ‘Girona’, bou di outoridat di e Tim Sentral di Ministerio Públiko di Kòrsou, Sint Maarten, Boneiru, Sint Eustatius, i Saba.
E Tim Sentral ta enfoká riba kombatimentu di korupshon i kriminalidat subversivo. Huntu ku RST, e tim ta investigá prinsipalmente krímen kompleho ku un komponente finansiero-ekonómiko.