Den e siman di 30 di mei pa 3 di yüni 2022 e Parkèt den promé instansha di Kòrsou a organisá un asina yamá “Afpakweek”.

Durante di e siman aki a debatí tokante di tur aspekto di konfiskashon di propiedat kriminal, for di konfiskashon te ku kitamentu di pertenensianan, a hasi esaki entre otro via di  workshop. Tur grupo di trabou di OM a haña “afpaktargets (ophetivo di konfiskashon)”.

E ophetivo ta simpel i efektivo: “ Stroba industria kriminal dor di kita propiedat atkerí penalmente di un forma inovativo i integral, pa asina manda un señal kla pa komunidat ku krímen no ta rekompensá.”

For di 2015, e Integrale Afpakteam Kòrsou (IAK) ta aktivo na Kòrsou.  Durante di su promé añanan e tim  a duna hopi resultado, pero e delaster añanan e resultadonan a bira konsiderablemente ménos. E motibu prinsipal pa ku esaki ta e kresiente falta di kapasidat di personal. Na kuminsamentu di e aña aki, a desmantelá e Afpakteam, pa asina kontinuá di un forma desentralisá denter di e diferente servisionan di mantenshon di órden.