Hustisia restorativo i mediashon ta fortalesé e aserkamentu orientá riba e persona den hustisia i edukashon.

Na sèptèmber a organisá masterclasses atrobe pa empleadonan di Korps Politie Curaçao (KPC) i SDKK. E trainingnan ta forma parti di un programa mas amplio ku ta wòrdu implementá for di 2021 den koperashon ku partnernan lokal i internashonal. Entretantu, mas ku 250 profeshonalnan den e sistema hudisial a risibí edukashon den trabou restorativo. Tambe a forma un grupo di mediadónan spesialisá pa guia mediashon den kasonan penal. 

Na mediashon den kasonan penal e akusado i e víktima, bou di guia, ta kombersá ku otro tokante loke a sosodé i kiko ta nesesario pa fomentá e rekuperashon. E Ministerio Públiko i e hues por tuma e akuerdo final, ku ta resultá di kombersashon konhunto aki, den konsiderashon ora nan tuma desishonnan den e persekushon i/òf sentensia. Partisipashon ta boluntario i ta sosodé solamente si tur partido ta di akuerdo. Esaki ta ofresé un posibilidat adishonal pa trese hustisia na e konsekuensianan personal di un delito.

Despues di e eksitoso aplikashon na Kòrsou, e programa a amplia pa Boneiru i Sint Maarten. Aki tambe tin mas i mas integrashon di e trabou restorativo den e maneho hudisial. 

Lokual ta nobo e aña aki, ta e ampliashon di e programa pa edukashon. Binti maestro na Kòrsou a haña entrenamentu pa guia asina yamá 'herstelcircles' (sírkulonan di restourashon) den skolnan sekundario. E meta ta pa siña hóbennan manehá konflikto, tuma responsabilidat pa nan komportashon i drecha relashonnan. E parti aki ta haña sosten di Ministerio di Enseñansa, Siensia, Kultura i Deporte.

Ku e desaroyo aki, e derecho di restorashon no solamente ta haña un posishon fiho den e lei penal, sino tambe den sosiedat en general- un invershon den e siguridat duradero i e konekshon sosial na Kòrsou.