Marian Veneberg, Fiskal Mayó di Ministerio Públiko BES a retirá for di su funshon di Fiskal Mayó despues di a konsultá ku Prokurador-general  (PG). Prokurador-general a bai di akuerdo ku esaki i riba un término kòrtiku Veneberg lo bandoná e puesto i sigui traha komo fiskal di Ministerio Públiko BES.

Medio febrüari Guillano Schoop ku ta e aktual Fiskal Mayó suplente di Ministerio Públiko Kòrsou, lo ta temporalmente enkargá ku e funshon. Mientrastantu Veneberg lo kumpli ku e funshon temporalmente.

“Mi a gusta mayoria aspekto di e funshon di Fiskal Mayó. E funshon aki a brinda mi e posibilidat/oportunidat pa regla hopi kos. Banda di esaki lamentablemente tin bários parti di e funshon ku no ta mi kos i pa e motibu aki ta kosta mi hopi energia i tempu” segun Veneberg. E ta spera ku den e ròl di fiskal tambe e por konta ku e bon koperashon di semper.