Djabièrnè 15 di mart 2024, 5 direktor di diferente negoshi a keda kondená na un kastigu di prizòn kondishonal di entre 2 pa 4 luna, ku un periodo di prueba di 3 aña, pa motibu ku na diferente aña nan a keda sin hasi deklarashon di impuesto riba ganashi (winstbelasting).

Korte a disidí ku nan mester hasi nan deklarashon fiskal denter di un término di tempu stipulá, inkluso e periodonan pa kual ya nan a risibí un “aanslag” taksativo. Durante e periodo di prueba mester hasi tur deklarashon i pagonan korespondiente na tempu i si kumpli ku e kondishonnan aki, lo no mester sinta kastigu.

Durante tratamentu di e kasonan a sali na kla ku un kantidat di empresa tin debe di belasten haltu ku ta varia entre 100.000,- pa 1.5 mion florin. Ademas, Ministerio Públiko  a eksigí pa pago di e debenan aki durante e periodo di prueba, pa motibu di deklarashonnan di Minister di Finansas den Komishon Sentral tokante privilegio fiskal pa sierto individuo.

Sinembargo, hues a stipulá ku e kondenadonan den un tempu kòrtiku mester drenta den un areglo di pago ku Ontvanger i mester tene nan mes na esaki. E la suprayá ku eventual problema na Ontvanger  ta responsabilidat di Minister pa solushoná.

E kondenadonan a deklará ku nan ke kumpli ku e kondishonnan, pero a ekspresá nan preokupashon tokante posibel konsekuensia di un karchi di kastigu, spesífikamente pa biahe internashonal por ehèmpel pa Merka. 

Den e último dos kasonan, abogadonan di e sospechosonan a bini ku un defensa tékniko. Ministerio Públiko tabata tin opheshon kontra di e defensanan aki. Dia 20 di mart próksimo, Korte lo dikta sentensia den e dos kasonan aki.