Dia 16 di febrüari 2023, Korte di Promé Instansia na Boneiru a kondená dos hòmber pa intento di homisidio i violensia públiko. Ta trata di J.R. di 19 aña di edat i H.A.C. di 33 aña di edat. Ámbos hòmber tabata involukrá den un bringamentu ku a tuma lugá den Kaya Grandi, kaminda ku e víktima a risibí herida serio ku te ainda ta molesti’é di manera ku e no por traha.

Den oranan di mardugá dia 14 di òktober 2022, tabatin un bringamentu entre kuater hòmber den Kaya Grandi. E motibu di e pelea aki te ainda ta deskonosí, pero tur konserní tabata bou di influensia di basta alkohòl. Imágennan di e bringamentu aki a keda kompartí riba retnan sosial , loke a kousa basta indignashon i un sentido di inseguridat den komunidat Boneriano.

E dos rumannan di parti mama, J.R. di 19 aña i H.A.C. di 33 aña a wòrdu sospechá di intento di homisidio i violensia públiko. A skòp e víktima diferente biaha den su kabes i dor di e heridanan ku e la sufri te ainda e no por traha.

Tur dos hòmbernan a keda sentensiá pa intento di homisidio. J.R. di 19 aña a keda sentensiá na 18 luna di detenshon hubenil di kua un gran parti kondishonal ku un periodo di prueba di dos (2) aña. Supervishon di Reclassering, kurso di prevenshon di alkohòl i violensia i eventualmente un tratamentu na Mental Health Caribbean (MHC) tambe ta forma parti di e sentensia aki. H.A.C. di 33 aña a keda sentensiá na sinku (5) aña di kastigu di prizòn. Entretantu, e la apelá e sentensia aki.

Ministerio Públiko ta spera ku e sentensianan aki lo tin un efekto preventivo kontra di violensia sin sentido i ku habitantenan di Boneiru por sinti nan mes mas sigur.