Bo ta bai ku fakansi afó i bo tin but(nan) habrí? Djasabra 11 di yüni 2022 ta bo último chèns pa drenta un areglo di pago ku e posibilidat di paga den término i bai fakansi i rilèks sin strès.

E areglo ta enserá ku pa e promé luna bo ta paga 25,- florin i sobrá por paga den término mensual den  máksimo di 18 luna. Pasa na ofisina di Paga bo But ku un karchi di identifikashon pa hasi bo areglo di pago i bo promé pago di NAF 25,-. Atenshon: no ta aseptá plaka kèsh, por paga solamente ku karchi di swaip. Tene na kuenta ku lo tin kòntròl di butnan habrí na aeropuerto pero no ta posibel pa hasi areglo di pago einan.

Djárason 15 di yüni 2022, Korte lo trata e ‘verkeerszitting’ mensual, den kual esnan ku a haña but den e último luna ta haña oportunidat pa defendé nan kaso. Si bo no paga bo but promé ku 14 di yüni 2022 bo ta kore riesgo ku den Korte e montante di but ta subi. Ministerio Públiko (OM) Kòrsou ta invitá tur outomobilista ku a haña but, ku ta bai ser tratá dia 15 di yüni 2022, pa bin paga e but promé ku djamars 14 di yüni 2022 pa di e forma aki evitá ku e but ta bira mas haltu. Riba djasabra 11 di yüni ofisina di Paga Bo But lo ta habrí di 8.30 ‘or di mainta te ku 1.30 ‘or di atardi. Djamars 14 di yüni ta habrí nònstòp di 7.30 ‘or di mainta te 4.30 ‘or di atardi.

Ofisina di Paga Bo But ta situá na Waaigat, pariba di ofisina di Curoil riba Abraham Chumaceiro Bulevar 11. Por hasi pago tambe online via bo banko riba kuenta di MCB 23329801. Ministerio Públiko ta konsehá kada persona ku tin but habrí, pasa paga e transakshon promé ku e kaso bai Korte i evitá ku e but ta subi. Sigui nos tambe riba Facebook: Paga bo But. Por haña mas informashon via WhatsApp: +59994342120 òf +59994342146.