No a pasa Ministerio Públiko forbèi ku tin hopi komentario riba retnan sosial tokante e kaso penal ku ta andando pa loke ta trata e aksidente di tráfiko fatal di 25 di desèmber di aña pasá, kaminda un outomobilista a dal un siklista. Korant tambe a duna e kaso aki atenshon.

E aksidente a keda kompará ku un otro aksidente fatal di algun aña pasá kaminda un outomobilista a pèrdè su bida despues di un dalmentuku un otro outo. Den e informashon ta pará ku Ministerio Públiko ta midi ku dos midí pa motibu ku den e aksidente di desèmber último e outomobilista a bai den aresto preventivo miéntras den e otro aksidente anterior, esaki no tabata e kaso.

Ounke Ministerio Públiko mester ta kouteloso pa duna informashon di kasonan ku ainda mester presentá dilanti hues, nos ta di opinion ku ta importante pa mustra ku no por kompará e dos kasonan aki ora ta trata aplikashon di aresto preventivo.

Legalmente aresto preventivo ta posibel solamente den kasonan di homisidio imboluntario (dood door schuld) den tráfiko ora ta trata di un outomobilista ku tin un kantidat kastigabel di alkohòl durante di e aksidente. Den e kaso di e aksidente fatal anterior no tabata tin kuestion di alkohòl determiná i pa e motibu aki no por a apliká aresto preventivo. Simpelmente lèi no ta ofresé e posibilidat ei.