Órden pa listramentu preventivo y último dia di kampaña di entrega di arma di kandela

E órden aki lo ta na vigor for di 3 di aprel 2026, 6 or di atardi te ku 6 di aprel 2026, 6 or di mainta. Durante e periodo aki, polis ta outorisá pa kontrolá personanan, inkluyendo nan paña, vehíkulo i ekipahe, sin mester di un motibu òf sospecho spesífiko.

 Manera lo ta konosí, tur hende ta obligá pa koperá ku e kòntròlnan aki. Inkumplimentu ku esaki lo resultá den un ofensa kastigabel ku lo ser persiguí.

 Djabièrnè 3 di aprel ta e último dia di e kampaña di entrega di arma di kandela ku ta andando. Te ku e fecha ei, personanan ku ainda tin un arma di kandela den nan  poseshon por entregá esaki sin kastigu.

 Esaki pues lo ta e último oportunidat pa entregá un arma di kandela sin konsekuensianan penal; Despues di 3 di aprel, kualke arma hañá lo kondusí direktamente na persekushon penal. Den e tipo di kasonan aki, Ministerio Públiko lo eksigí un kastigu supstansialmente oumentá durante di tratamentu di e kaso na Korte.

 Ku e medidanan aki Kuerpo Polisial Hulanda Karibense (KPCN) i Ministerio Públiko tin komo meta pa kontribuí na seguridat i órden públiko na Boneiru.