Ministerio Públiko ta eksigí kastigu di prizòn pa froude (di belasten) i labamentu di plaka
Ministerio Públiko di Parkèt di Promé Instansia di BES awe a demandá kastigu di prizòn di respektivamente 9, 12, i 18 luna kontra di tres persona durante tratamentu di un kaso penal dor di Korte di Promé Instansia BES (e “Korte”). Ademas, a eksigí un prohibishon profeshonal temporal kontra di dos di nan. E akusashonnan ta relashoná ku froude di belasten, falsifikashon di dokumento i labamentu di plaka. Tratamentu di e kaso den su kontenido a tuma luga ayera i awe.
Servisio di Inteligensia Fiskal (“FIOD”) den koperashon ku Kuerpo Polisial di Hulanda Karibense (“KPCN”) a kondusí e investigashon penal riba e echonan aki, ku a haña e nòmber “Holmpton”. Riba 28 di mei 2024, wes komisario a hasi entrada hudisial den un edifisio komersial i dos residensia en konekshon ku e investigashon aki.
Ministerio Públiko ta sospechá un di e tres personanan aki di a malversá sumanan di plaka di un kompania di konstrukshon boneriano – den e kalidat di akóuntent E sumanan aki tabata destiná pa paga e belasten di e kompania pero a termina den e aktivonan privá di e sospechoso. Ademas e sospechoso supuestamente a komete froude pa loke ta e aangifte di belasten di e kompania. Di akuerdo ku Ministerio Públiko, Belasting- en Douane Administratie di Hulanda Karibense (“BCN”) a keda defroudá mas ku 490.000 dòler.
Ademas, segun Ministerio Públiko, e tres personanan aki —den koperashon ku otro—a laba e plaka hòrtá durante vários añai a falsifiká vários dokumento pa e fin ei. En total, ta sospechá ku a laba mas ku 190.000 dòler.
Un di nan ta un sospechoso den dos otro investigashon penal tambe. Un investigashon tokante e falsifikashon di un kantidat grandi di dokumento ku e propósito di optené pèrmit di trabou i estadia serka Servisio di Imigrashon i Naturalisashon (“IND”). I un otro investigashon tokante e falsifikashon di kuentanan anual i avisonan di bezwaar entregá na BCN. A trata e kasonan penal aki awe tambe huntu ku investigashon “Holmpton”.
Froude i labamentu di fondonan kriminal ta perhudiká no solamente e víktimanan direkto pero tambe henter e sosiedat boneriano. Froude di belasten ta resultá tambe den redukshon di entrada pa BCN, loke na su turno ta trese riesgo pa situashon finansiero di Boneiru. Tambe, esaki ta kondusí na kompetensia inhustu kontra empresanan ku ta kumpli ku nan obligashonnan di belasten. Pa e motibu aki Ministerio Públiko ta intensifiká e persekushon penal di fraude (di belasten) i labamentu di plaka den kombatimentu di kriminalidat finansiero.
Korte lo dikta sentensia riba 1 di oktober 2026