Dia 15 di mart próksimo lo tin elekshon di konseho insular i kolegio elektoral. Elekshon liber i hustu ta base di nos estado di derechi demokrátiko i pa e motibu aki hopi importante pa habitantenan di Hulanda Karibense.

Kon elekshonnan mester kana ta reglá den e lèi elektoral. Den e lèi aki tin skibí lokual no ta permití rondó di elekshon i kua ta e sanshonnan pa echonan kastigabel.

Ministerio Públiko ta vigilá pa señalnan di echonan kastigabel rondó di elekshon keda investigá  i ora mester, persiguí. Por haña e señalnan dor ku a hasi un denunsia pero nan por ta konosí dor di un otro forma serka Ministerio Públiko. Den e kaso aki por hasi un investigashon penal sin ku a hasi un denunsia.

Den e lèi elektoral tin entre otro reglá ku no ta permití pa haña un apoderashon di un persona ku derechi di vota dor di un regalo òf un promesa. Bendementu di bo apoderashon tampoko ta permití. Kada echo tin un kastigu di prizòn di seis (6) luna mará na dje.

Segun e lèi elektoral, reklutá apoderashon tambe ta un echo kastigabel. Pues, maske no tin un rekompensa pa esaki, tòg no ta permití pa aserká personanan ku derechi di vota pa haña nan apoderashon.

Esensia di e ponensianan kastigabel ta ku kada persona ku derechi di vota, por hasi esaki liber i ku e voto di kada persona ta konta di mesun manera pa e resultado. Solamente di e manera aki por garantisá elekshon liber i hustu.

Un elekshon kompletamente liber i sekreto ta un kondishon pa por papia di un elekshon hustu. Sin un elekshon hustu fundeshi di nos sistema demokrátiko ta keda afektá. Ministerio Públiko lo vigilá tur akto ku ta en kontra di e lèi elektoral i ku tur siudadano di bèrdat ta liber pa determiná nan eskoho i por antispá e dia importante aki ku un kurason trankil.

Pa mas informashon por referí na www.kiesraad.nl/verkiezingen/eilandsraden(lenk eksterno) i pa Boneiru www.bonairestemt.nl(lenk eksterno).