Ya pa basta tempu kaba tin un página di Facebook aktivo na Boneiru bou di nòmber di “Wim van Huizen”. Riba e página aki regularmente ta pone mensahenan ku kontenido ku ta instigá, menasá i/òf insultá. Gezaghèber di Boneiru i tambe varios àmtenar di gobièrnu a keda menasá. Di esaki a hasi denunsia.

Relashoná ku esaki tabatin diferente entrada hudisial awe mainta tantu na Boneiru komo na Kòrsou. Na Boneiru a hasi entrada na un kas dor di KPCN bou di guia di Ministerio Públiko BES. Un hende muhé a keda detené. Na Kòrsou a hasi entrada den un kas i un negoshi dor di KPC i RST bou di guia di OM BES. Tantu na Kòrsou komo na Boneiru a konfiská kargadó di datos. Na Kòrsou ainda no tabatin detenshon.

E kaso ta den investigashon.