Openbaar Ministerie-Curacao-Sint Maarten-BES Islands

Organisashon

E Parkèt di Fiskalnan di e islanan BES na Sint Eustatius (deskubrí dor di Columbus na 1493) ta domisiliá den e Fort Oranje’monumental’.

Den siglo djeshete/djesocho/djesnuebe Sint Eustatius tabata tin aproksimadamente 24 fòrti, batrèi i artieria. No opstante esaki a logra e enemigunan (fransesnan, inglesnan) pa subi tera 23 biaha entre 1636 i 1816.

Fort Oranje ta un di e strukturanan di defensa ku a sobra riba e isla. E otronan ta:  e restonan di e fòrtinan Chitchie, Panga, Amsterdam òf Waterfort, Nieuwe Fort i e batrèinan Bouille, Dollijn, La Haye, Nassau, Frederick, de Windt, Corre Corre, St. Louis, Concordia, na e bahía Zeelandia, Venus, Coculus, Jenkins, Tommelendijk, i tambe batrèi Jussac, Royale, Rotterdam i di Gilboa, i de e brùg pa fuga riba seru Gilboa.

E struktura di defensa a wòrdu konstruí den aña 1636 riba e restunan di un fortifikashon franses ku ta data di 1629. Fransesnan (Kapitan Rotondy) di e isla bisiña, St. Kitts, a laga traha un fòrti chikí òf un fortifikashon den 1629 na Sint Eustatius pa kombatí un eventual atake spañó. Pasombra ta tin di menos awa di bebe riba e isla, e la wòrdu abandoná atrobe despues di un par di aña.
Riba 25 di aprel 1636 e Zelandesnan bou di mando di Pieter van Corselles, na nòmber di e Kamber di Zelanda di e Nederlandse West-Indische Compagnie, a tuma e isla desokupá aki den poseshon. E Ulandesnan a konstruí e aktual Fort Oranje riba e mesun sitio kaminda e fòrti chikí franses tabata.

Den e añanan despues di esaki, e fòrti a wòrdu renobá i ampliá varios biaha. E forma aktual ta data di komienso siglo djesocho. E struktura di defensa di forma di un kuarto-sírkulo ta konsistí di tres bastion ku entre nan murayanan impreshonante. Den e bastion na nort tin un entrada. Riba e murayanan  na banda di laman tin varios kañon di lain òp, sinembargo no di siglo djesocho, pero di un fecha mas resien.

Ta for di e fòrti aki ku riba 16 di november 1776 a lòs e famoso Firs Salute.
Gobernador Johannes de Graaff (nasé den 1729 na Sint Eustatius) a laga e kañonnan di e fòrti duna un salutashon na e Bandera nobo di Estádos Unidos, e Great Union flag, di e djestres kolonianan insurgente Norte-amerikano ku a kaba di deklará nan mes independiente for di nan madre patria britániko.

E Merikanonan a interpretá esaki komo e promé rekonosementu di nan independensia dor di un potensia estranhero i nan a honrá De Graaff komo un héroe. E tabata un di e motibunan pa e di Kuater Guerra Ingles (1780-1784).

Na komienso di siglo djesnuebe tabata tin un guarnishon ku tabata konsistí di infanteria (yagdónan) i artiera stashoná den Fort Oranje. Den 1829 tabata tin dos “djesdos liber”(di e salutashon original) ahinda den e Fòrti ku te ku 1882 a wòrdu husá pa lòs tiru di salutashon riba hasimentunan di aña di kasa real.

Tambe ora di un transferensha di gobierno, nan tabata lòs tiru di salutashon. Pero pasombra di e situashon deplorabel di e kañonnan, nan tabata parti e tirunan na tres:  djesun mahinta, dejsun merdia i djesun kuator. Despues di 1919 ku no tabata nombra un  gezaghebber  propio p-a Sint Eustatius, e tirunan di salutashon a wòrdu eliminá.

Den desèmber di 1829 a renobá Fort Oranje, mirando ku e tabata kayendo den deterioro. E murayanan a wòrdu drechá, e edifisio di porta (awor parkèt di fiskalnan) a wòrdu drechá i e kas di e komandante di e guarnishon a wòrdu ekipá riba e edifisio di porta. Den 1846 e guarnishon a bai i e fòrti tabata para bashí. Despues di esaki e Fòrti a wòrdu drechá atrobe i ekipá komo sentro di gobernashon.  E kòmandùr, despues di 1833 gezaghebber, despues di 1919 gezaghebber suplente, despues di 1951 atministrador i despues di 1983 gezaghebber atrobe, tabata tin su ofisina den fòrti. Servisionan gubernamental i prizòn tambe tabata situá den e fòrti.

Te ku 1979 no tabata presta hopi atenshon na mantenshon. Den 1979 tabata tin un restourashon riguroso: e tres bastionnan a haña un fundeshi nobo; murayanan a haña kènter nobo, e edifisionan eksistente a wòrdu destruí i konstruí di nobo den e estilo bieuw pero di materialnan nobo.

E presidente merikano Franklin Delano Roosevelt a ofresé den 1939 pa rekonosementu di e salutashon di 1776 un plakat ku a haña un lugá kontra di e pal’i bandera riba e plenchi di e fòrti. E traspaso di e plakat aki a tuma lugá riba 12 di desèmber 1939.
A establesé e obelisko den e sentro di e patio den rekuerdo di e bishita di teniente-atmiral Michiel Adriaensz de Ruyter (1606-1676) den mei di1665 na e isla. Por lo demas, e héroe marítimo aki a bishitá Sint Eustatius dos biaha. E promé biaha tabata den 1647.
Ademas di e obelisko i e plakat di koper, Fort Oranje tin dos mas monumento konmemorativo. Un di e monumentonan konmemorativo ta data di 1957 i ta korda esnan ku a fayesé den segunda guerra mundial. I den 1976 a pone un di kuater monumento konmemorativo pa rekordá e 200 aña di eksistensha di Merka, ku a ser duná dor di Islanan Vírgen Merikano. Nos ta haña un oloshi di solo tambe.

Ademas di e Parkèt di Fiskalnan/Reclassering e siguiente servisionan tambe ta ubiká den Fort Oranje: Servisio di Planifikashon; i e ofisina di turismo.

Fuente: De forten, verdedigingswerken en geschutsstellingen van St. Eustatius en Saba van dr J de Hartog. 1997

Tempel 261012 005.jpg
BES-09
BES-05
SXM-01
Tempel 261012 011.jpg